臉書有個迷你Blog

嘩嘩嘩…一萬年無更新, 原因係超忙(得閒果陣又同超懶 :p)…

響過去幾個月,我去左上course讀克羅地亞文,又去左考車牌,變左做全職學生。三十歲人突然由師奶變學生加師奶,本來平靜的生活變得好忙碌,晏覺都無得訓呀陰公豬 (>(00)<) 其實有好多事發生,有好多感受想記下來,但響打Blog同放空休息之間我選擇左後者。

不過,我偶然都有響Facebook短短記錄了響格仔國的生活點滴,有圖又中英雙語。呢個大Blog唔會摺埋,但非常不定期更新。小Blog就密好多,大家有興趣就follow一下啦~

個名叫「多爸丹Dobar dan」,響克羅地亞話Good Day的意思 🙂 希望大家每日都係Good Day!

https://www.facebook.com/hkxcroatia?fref=nf

Advertisements

格仔國民必看的電影

聲明: 本文有成人內容,正氣人士慎入!

 

話說跟香港朋友仔講起美國真人騷女星Kim Kardashian最近幫某雜誌拍左一輯性感露股照,老外們議論紛紛。但原來香港好似無咩人知呢件事,仲要連Kim Kardashian係邊個都唔係好知⋯我都有D surprise 😮 阿Kim姐係因為佢同前男友的春宮片被人放上網而一炮而紅(同Paris Hilton一樣,佢兩個以前仲要係friend),再加上佢天生有個超有曲線的屁股,成日都差D逼爆裙而成為話題女王。

這張就係Kim Kardashian最近的露股雜誌相。不嬲都知佢下盤勁,但望到呢張相都有幾秒以為係假。好心佢唔好搽油啦⋯成件事好膠

除左pat pat, Kim小姐仲有露點。 。 有人批評佢身為人母都拍呢種照片,不過Kim小姐覺得好有藝術感。唔知香港的媽媽們又點睇呢?

咁究竟Kim K.同克羅地亞有咩關係?其實克羅地亞都有一個咁出位的女明星,佢個大名叫Severina。記得當年我第一次去克羅地亞,果邊D朋友樣衰衰咁問我想唔想睇克羅地亞最受歡迎的電影,個個人都有睇過,講到咁吸引,梗係唔好執輸啦睇埋一份啦!點知一開我就要立即遮住眼⋯因為一開始已經好激動,又有好多高難度動作,跟專業AV女郎係有過之而無不及。後來聽聞佢當時係食左藥,所以先有咁「忘我」的演出。條片剛上果陣可以話係哄動整個格仔國同鄰近國家,令呢個原本平半紅不黑的女明星一下子上左好幾日頭條,個個都爭住要睇四仔無格仔,反而令佢人氣急升。佢亦都打正旗號賣性感,都無所謂啦,反正大家都睇過曬 😛 依家,Severina係巴爾幹半島最紅的女歌手,即使歌藝真係好普通。佢仲有同人結過婚,生埋仔⋯真係擔心有日阿仔睇到阿媽的代表作會唔知點反應。

Severina姐,40幾歲女人呢講真係keep得好,加埋個厚唇,都幾sexy! 佢依家有個賣雪糕廣告,真係叫人想入非非⋯勾起大家(OK,其實主要係男士們)對佢響佢自己條片的激情演出的回憶⋯oooooo

英雄莫問出處,雖然俾全國人民看光光,但依家佢係diva…仲好鍾意走high fashion路線。年輕一代,特別係女仔,其實幾鍾意佢。

睇返香港,我地都有個陳冠希同一班女星發生類似的事件,但下場好唔同⋯佢地成為過街老鼠⋯連原本好紅的「天真嬌」都立即人氣大跌。究竟係咪因為香港衛道之士太多的緣故呢?咁呢班外國春宮片女主角人氣不跌反升又係咪只因為老外們性開放一D,可以接受到公眾人物響幾千萬人面前腿張開呢?呢個「同人唔同命」的文化差異好值得探討一下。

爆野留番最後,大家如果有想睇吓Severina條片,只要Google “Severina sex tape”都已經有好多cap圖。不過事先聲明,有virus唔好懶我呀 😛

格仔國超市

作為全職師奶,我當然成日逛超市啦。其實呢度的超市同香港果D格局上同貨品種類上係無咩好大差別,不過個別的產品佔全場的比例就同香港好唔同,亦都完全反映左格仔國人民響飲食方面的愛好同特色。

響未入正題之前,想介紹一下呢間響克羅地亞南部有比較多分店的超市…佢有個好無克羅地亞feel的名,叫TOMMY -__-“ 阿TOMMY有個特色係佢會響個招牌度已經交代左果間分店的size。你可以搵到TOMMY,TOMMY Ultra Market,TOMMY Maxi Market同TOMMY Hiper Market。Hiper係最大size…雖然根據英文,Maxi應該先係最大…不過撇開排序的迷思,呢D “Ultra”呀,”Maxi”呀只令我聯想起…M巾 😛 Sorry,有D嘔心,但我都唔想架~~~ 我屋企附近果間係Maxi 😉

好近入口就已經見到好長的一排Pasta! 我諗響歐洲Pasta係主糧係正常不過的事,所以佢地實至名歸霸左好多位…反觀白米,唔知點解呢度主要係賣1公斤裝,好難搵到大包裝,可能真係佢地平日少食的緣故…即使有差唔多10個牌子的米,但只係佔左好少位。格仔國民嚟香港見到8公斤米應該會嚇親…呢邊會有8公斤裝的應該只有薯仔,花泥同洗衣粉 😉

20141105_193233

成行差唔多由頭到尾都係pasta,咩款式都有

行去另一條走廊,見到霸左差唔多半條路的麵粉區。響香港應該無咁多掛,始終唔係有多人屋企有焗爐可以成日焗Pizza,麵包,蛋糕…響克羅地亞的屋企一定要有焗爐同埋有麵粉看門口…就算唔整Pizza,呢度D女仔都好鍾意整Pancake食 🙂 不過呢邊就無糯米粉,太白粉果類型的東西…

20141105_193213

麵粉牆呀!呢度麵粉都幾平,5-7HKD一公斤…可以整到好多pizza囉~

呢一part響香港應該只有國際化少少的超市先有就係…TA-DA…芝士同Salami專櫃! 因為格仔國人民愛包如命,送包就一定要有芝士呀、火腿呀、Salami呀,所以呢一個區就算響再細的超市都一定會存在…可以無新鮮肉但唔可以無Salami同火腿! 咁有部份原因係新鮮肉比較貴,要食住火腿止吓肉癮先 :p

20141108_111744

排得整整齊齊的salami,入少少有火腿。可以成條買,亦可以叫嬸嬸切你所需要的份量~

20141108_111859

要講到佔地最大的產品非飲品莫屬…to be specific,係酒精類飲品! 其實都唔係好出奇,因為呢度D人無酒不歡…我屋企就有一個,個啤酒肚大到呢…>:( 佢通常一踏入超市就拋低我然後直奔酒區,男人! (吼)。酒精類飲品中,葡萄酒同啤酒可以話平分秋色…兩個都佔好多 😛

20141105_193648

pasta,麵粉果D都係佔一條走廊,但飲品係好大的一個區…而個區入面只有中間果part係D果汁呀,汽水呀,其他全部都係酒~

講完佔地最大,就睇吓最細啦…就係外國食品啦! 亞洲食品加埋D墨西哥Tortilla,Salsa醬等等先佔麵粉區的四份之一…仲要呢間係Maxi size先叫多D…細超市係完全無得賣,陰公豬~~~ 選擇少係一個問題,本地人比較怕試新口味又係另一個問題…最慘係價錢貴到爆…見到個杯麵要25港幣一個,仲要係合味道的size…真係幾大癮都即刻收左皮 :0 所以有時都難怪D 本地人唔買,唔想試新野…

20141105_193509

好啦,一眼睇晒的「非歐洲食品區」…有醬汁(豉油,teriyaki,curry,甜酸醬等)、杯麵、米粉、壽司米、tortilla…

20141105_193455

「貴到喊」例子一: 330g炒麵配菜(芽菜,紅蘿蔔絲,etc.) 要接近40HKD…痴線架

20141105_193516

「貴到喊」例子二– 杯麵…雖然上面寫soba(蕎麥麵),但都唔洗要25蚊呀嗎?

雖然克羅地亞整體上各類產品的選擇都無咩選擇,但你話生活唔到咩又唔係…響小鎮生活耐左人都變得簡單D (可能屈服於環境的限制),小小的新鮮事都會變成大大的驚喜,好抵呀 😀

中國婦女會

一開始以為自己有個克羅地亞男友是如何驚天地泣鬼神的奇事,覺得自己如何勇敢,如何特別…諗返起都覺得自己好無聊同天真(羞)。來到這邊生活後就發現左其實跟我一樣同克男談戀愛的華女都有不少。單單響SPLIT這個小鎮都有5個…相信響首都ZAGREB會有更多。

婦女會唔係一個真實的組織,係我自己私下叫呢班FRIEND的…好老土,我知…哈哈!我有個朋友好賤,叫我改叫「中女會」…事實上我地又的確係中女啦,我係當中唯一仲未過三十又未做媽媽的,不過應該都會就快加盟,然後一齊研究湊仔經…唉~而家齋幻想都覺得青春離我好遠…嗚

婦女會中我唔係唯一的香港代表,仲有Valeria! 我其實同佢響差唔多時間第一次去克羅地亞,分別認識左自己的男朋友。不過我之後就返HK開始LONG D,佢就好快結左婚,仲張自己的愛情故事出版成書添!佢同佢老公的邂逅又真係幾DRAMATIC,係響SPLIT問路果時一見鍾情 ❤ 我想講我同我老公第一次見面後我係完全唔記得佢個樣…要第三次見面先開始記得住 😛 所以Valeria能夠一見鍾情真係好難得!佢個仔Antonio好靚仔,好混血,不過極度活潑…同佢玩需要大量體力…難怪Valeria咁瘦 😛

第二位要介紹的係Jessica,上海人,佢住左響SPLIT 6年啦,有兩位千金。克羅地亞話說得很流利,但原來佢係唔識英文架 (Shhhh…)我呢個識識地英文都覺得學克羅地亞話好難,好難想像佢一開始係點學…同埋個重點係佢點樣同佢老公拍拖呢?謎底解開—請翻譯!!!好特別的戀愛啊~究竟佢地親密的時候,翻譯小姐係咪都在場STAND BY呢?真係不得而知啦…

1415_resized

響我婚禮影的合照–(左至右)Valeria, Antonio B, 我, Jessica, 大千金Ana, Rainee, 靚仔Tino

第三位係Yang,天津人,同老公之前係同事。響內地結婚後就搬過嚟SPLIT住。Yang的仔仔Stipe係超重寶寶同埋超嚴肅,所以我地要成日想辦法氹佢笑…老公又成日工幹不在家,一個人帶孩子真不容易。Valeria同Jessica老公都係船員,每次出海就係幾個月…買菜、做家務加湊B一腳踼…點可以唔俾個叻呢班女人?

Stipe

半年前的小Stipe…好認真的一個B, 依家都係…

第四位係Julie,天呀,佢已經住左10年啦,仲要攞埋戶籍,係克羅地亞公民呢!我諗Julie 10年前嚟果時可能一個中國人都無,如果我係佢都唔知點算,當時佢應該都有感受過一些不友善的目光但又無同聲同氣的朋友可以訴苦,日子好難過啊…不過依家佢又係中文老師,又係導遊、翻譯,係豐收期。我都好想可以有自己的事業呀…可惜好懶 😛

最後一位係Rainee,佢老公係黑山人,響SPLIT開餐廳,生意都唔錯。Rainee自己本身響國際酒店做左好多年,依家幫老公手做員工training,夫唱婦隨的生活都很不錯啊!我同Rainee都幾投緣因為大家都喜歡吃,又會經常試不同餐廳同菜式 🙂 希望佢老公生意繼續發展,咁Rainee就可以留響SPLIT同我地玩。

成班女人多多少少都會有D是非,但大家都好珍惜呢個緣份。全世界咁多地方,咁多男人,但偏偏大家都同SPLIT扯上關係,開始過一段同響老家好唔一樣的生活,當中的苦跟甜亦只有佢地明白。希望婦女會的MEMBER會越來越多啦!

gathering_1

婦女會加老公們聚餐實況1

gathering_2

聚餐實況二…大家好有機心呀化粧出席 :P…我個素顏LOOK實在太素…接受唔到… (左)Julie, (右) Yang

「不可能錯過你」系列之紀念(食)品三 —松露

少少宣傳:

今年香港的WINE AND DINE FESTIVAL會有克羅地亞酒同松露參展啊 ❤ 大家唔洗親身飛過嚟試啦! 今次會有HVAR島的ZLATAN OTOK酒莊的出品…佢地D酒有攞過國際獎項架。除左克羅地亞酒,好似仲有斯洛文尼亞同羅馬尼亞的…呢D應該都係超市甚至CITY SUPER都未必有;) 將D酒引入HK的MANDY小姐之前有嚟過SPLIT,我同佢有一面之緣啦。佢仲會響個BOOTH度介紹埋佢上次去過的TRUFFLE TASTING添。大家唔好錯過!

INFO:

WINEPRINTS CO. (BOOTH E309 Discovery Zone)
30 Oct 8-10pm
31 Oct 4-10pm
1 Nov 12-10pm
2 Nov 12-10pm

——————————————————————————

松露,菇界鑽石級人物,尤其是白松露。全世界出產松露的地方唔多,因為它們需要某種特定的氣候和濕度。響歐洲,最出名的松露之家應該係意大利,但其實格仔國同意大利接壤的ISTRIA半島都係盛產黑白松露的天堂:) 健力士世界紀錄最大粒白松露(唔知係咪賭王投返嚟果粒)就係響克羅地亞發掘出嚟架啦! 紀錄至今仍然保持!

如果真心鍾意食松露,就堅要去ISTRIA一趟!雖然你響克羅地亞其他城鎮的一些SOUVENIR SHOP或者大超市可以買到松露醬或者松露油,但點都比唔上響ISTRIA的松露專門店度可以試食,有專家同你介紹,仲可以買到D特別的產品好似松露芝士、松露PASTA、松露朱古力等等咁正。

我響剛過去的夏天去左ISTRIA一個叫MOTOVUN的小山城。由於個城位於松露森林附近,又多遊客,所以有超多賣松露的店。基本上一踏入個舊城區就可以聞到果浸松露獨有的味響空氣中瀰漫住。朋友們都買左D松露醬用嚟配多士呀,PASTA呀等等。而我就買左松露意粉同露筍意粉,因為比較平又特別…隔住個袋都聞到淡淡的香氣,但一煮完係無.味.道的…-__-“”(唔知係咪因為仲有一個月就到期的緣故)露筍果款稍為好D,都仲食到少少味…

croatia_truffle

戰利品! (左上) ZIGANTE黑松露切片…呢個品牌算大,有好多分店。健力士紀錄大白松露就係呢間公司的老闆掘到架! 除左切片,仲有各種松露醬同松露芝士醬…用家話陣味好濃,但食落就淡D (左下) NATURA牌白松露朱古力…氣味超方香,但我仲未捨得食,所以唔知味道如何…但「浸徐」已經夠掂啦!! (右)好出「色」但無味的松露意粉..要買懶特別意粉可考慮露筍味.

ISTRIA除左有松露,仲有好多靚景。可惜交通唔方便,建議自駕遊或者參加包接送的DAY TOUR (有一款係松露HUNTING,可以睇到隻狗仔點樣搵粒松露出嚟)。有好幾個克羅地亞的旅行社有做呢D ISTRIA DAY TOUR,但我上次同朋友係報呢個香港人安排的團,簡直係明智之選! 搵日再詳細介紹果次旅程;) 由5月到11月都係好時節,10月仲有各式各樣的松露FESTIVAL…響BUZET (TOWN OF TRUFFLE,好勁)會有好多松露食品,聽聞連雪糕都有(!?)…大家可以考慮一下:)

最後要介紹的是呢款響超市買的PASTA用嚟配松露醬等你返到HK都會食到ISTRIA的味道。響ISTRIA有款傳統手製PASTA叫FUŽI (音: FU-SHI),個樣有D似長通粉。大部份餐廳都見到MENU有松露配FUŽI。大家見到” FUŽI”就買嚟試吓…如果搵唔到,我覺得呢隻PASTA都好味,味道同FUŽI都幾似,不過就厚身D 🙂

FUŽI

無FUZI就可以買呢個…好味的PASTA 🙂

大家如果想試吓格仔國松露配靚酒,可以去10月尾的WINE AND DINE搵BOOTH E204呀!

「不可能錯過你」系列之紀念(食)品二 — 葡萄酒

祖屋的首季度業績唔錯,由七月中到九月尾大部份日子都有客。我而家終於可以休息一陣…多D時間寫BLOG。上次預告左今篇講葡萄酒同松露…我呢D婦孺唔係咩專家,只係想介紹吓一D懶FANCY野俾一D同我一樣唔識飲/食但又有少少想有偽中產LIFESTYLE的朋友。有識之士,請不要太執著:P

葡萄酒

克羅地亞其實有出產好多優質的葡萄酒(有攞過國際獎項呢),不過響香港好少有聽聞過同試過…因為佢地D酒少出口。原因係:

  • D酒莊地方細,加上堅持人手摘提子,成本自然偏高…但又無好大的名氣去支持,唔似法國酒咁貴一貴都有人爭住買去…
  • 又係因為D酒莊地方細,酒的產量唔係多到夠應付內需(滿街的餐廳同飲酒好似飲水的國民)之餘仲可以勁出口…

總而言之,大家響香港好難到飲到克羅地亞酒,所以一埸嚟到就一定要試吓!仲可以買番一兩支好野返去俾老闆或長輩…即刻好似好有品味咁 😉 以下介紹一D克羅地亞酒的葡萄品種(只有中歐,巴爾幹半島先有)、出名產區同幾支我親身試過或親耳聽聞係正野的酒。

極速入門簡介

紅酒葡萄品種: PLAVAC, PLAVAC MALI

白酒葡萄品種: MALVAZIJA, POŠIP, GRAŠEVINA, BOGDANUŠA

出名產區: HVAR, PELJEŠAC (DINGAČ, POSTUP), KORČULA, ILOK

*根據我響超市格價,最貴的酒通常係來自PELJEŠAC和HVAR的,可以去到200KN(~260HKD)一支…但一般嚟講40KN(~50HKD)左右已經可以買到好酒架啦~

如果其他大路品種好似CHARDONNAY, MERLOT等等都有啦…超多選擇!

MALVAZIJA白酒

MALVAZIJA白酒,只係響鄰近意大利的ISTRIA地區先有。我鍾意佢易入口,夠FRUITY…特別係呢個牌子:)

ILOCKI PODRUMI係個酒莊名,佢位於克羅地亞東部的一個叫ILOK的小鎮。果個小鎮有悠久的釀酒歷史...我覺得果邊的白酒唔錯...

ILOCKI PODRUMI係個酒莊名,葡萄出產於克羅地亞東部的一個叫ILOK的小鎮。果個小鎮有悠久的釀酒歷史…我覺得果邊的白酒唔錯…最近佢地的GRAŠEVINA仲攞獎添~

來自KORCULA島的呢支酒好多餐廳都有得飲..信得過!POSIP呢隻提子係克羅地亞先有架!.響餐廳飲比響超市買返屋企飲貴一倍…你自己諗啦…

ZLATAN OTOK,好出名的一個酒莊,位於HVAR島(係呀,祖屋個島)。佢地呢隻POSIP白酒有攞過獎架!

呢隻PLAVAC MALI紅酒,來自PELJESAC半島,好出名的產區! PLAVAC 同埋PLAVAC MALI都係克羅地亞自家品種…大家要試喔!MADIRAZZA係間公司,佢地D 酒品質有保證…好多本地人會知呢個牌子。

DINGAC係PELJESAC半島的一個區…果度的酒特別好。認住個名呀同隻驢仔呀 🙂

講真,我買酒都係主要睇產區同葡萄品種(同價錢啦OF COURSE)…年份真係唔識。真係好鍾意品酒的朋友可以預先做D RESEARCH…呢個BLOG應該幫到手;)

https://winesofcroatia.wordpress.com/

我通常都係響超市買返屋企飲,但如果你想要有個特別D的體驗,可以考慮去酒莊參加WINE TASTING TOUR或者去一D WINE BAR度試。響SPLIT有間出名的WINE & CHEESE BAR叫PARADOX…非常唔錯,可以試吓有專家PAIR好的克羅地亞CHEESE同酒,有時仲有LIVE MUSIC PERFORMANCE添…好歐洲FEEL,又AFFORDABLE!

寫吓寫吓又咁長…松露仔又要擺落下篇…SORRY!

「不可能錯過你」系列之紀念(食)品一

去旅行,雖然唔係話一定要買手信,但唔買又好似有D唔識做,特別係當你身邊D同事朋友親戚鄰居,甚至樓下看更阿叔都知你要去克羅地亞,呢個聽完都唔知響邊的國家…大家都熱切期待聽你分享所見所聞同埋你去旅行都「記掛住大家」的證據–當地手信!

買手信通常都係買野食,穩陣得嚟又方便share 😉 今次就講吓格仔國有咩野食係響香港未必有而又值得買。(朋友之前話響759都見到克羅地亞罐頭同BB餅乾…所以有可能我要介紹D野已經響香港賣緊 >.<)

KRAŠ DOMAćICA朱古力餅  

KRAŠ係老字號,旗下產品包括朱古力、餅乾同糖果。佢其實最出名的產品係朱古力BAJADERA,不過我個人唔係太鍾意杏仁味…但個盒睇落都小GRAND,如果想送俾高級人士或者長輩,可以考慮。我愛的是「住家菜」DOMAćICA朱古力餅 ❤ DOMAćICA解HOUSEWIFE 😛 塊餅個底沾左朱古力醬,所以大熱天時食係會食到成手朱古力…建議大家放入雪櫃雪吓先。目前DOMAćICA有四種口味: 原味(MILK CHOCOLATE)、DARK CHOCOLATE、WHITE CHOCOLATE同橙味朱古力配麥餅。我未試曬所有,不過原味已經係經典又唔太甜 🙂 之前朋友嚟探我都有大手購買原味做手信,十幾二十蚊港紙一盒,真係幾抵GA~~

好味朱古力餅!俾同事最FIT! 除左盒裝,仲有小包裝添~~

呢盒就係杏仁朱古力BAJADERA啦!個盒好易認,入面D朱古力有獨立包裝。

風乾火腿PRŠUT同辣肉腸KULEN

格仔國國寶PRŠUT(即係意大利PROSCIUTTO, PARMA HAM D FRIEND),你讀 “PRO-SHUU-TO”人地應該聽得明。呢塊風乾火腿係格仔國國民人生每個重要階段,包括出世、受洗、畢業、結婚、生仔同死都會出現的食物,大時大節的家庭聚餐亦都唔可以無左佢。我暫時諗唔到響香港有咩食物可以咁勁,咁廣受愛戴,又適合各個埸合同埋無人食厭…

ANYWAY,同一般響香港食到的PARMA HAM有D唔同,佢厚切,唔透光,顏色偏深紅色。通常街市有專賣PRŠUT同SALAMI的鋪頭,但超市果D都唔差,特別係TOMMY超市。真空獨立包裝,響芝士同SALAMI專櫃就會可以搵到。我帶過PRŠUT返老家好幾次,都無變壞…PRŠUT你可以生食,亦可以用佢卷住雞排煎或者同芝士一齊釀入雞或牛排去煎焗都好正!!!

PRŠUT以外,我覺得辣肉腸KULEN味道都唔錯,主要材料係紅椒(PAPRIKA)同豬肉。佢係格仔國的東北佳麗,果邊氣候比較寒冷,食物口味偏辣同濃。KULEN就BB辣啦,嗜辣的朋友應該會俾克羅地亞菜悶死…但我覺得用KULEN嚟做三文治同PIZZA係幾好味。

PRSUT!! 已經睇到D膽固醇同你SAY HI! 但通常好吃的都係唔健康…

KULEN!買呢種包裝比較方便!

地中海香草或調味料

如果你或你朋友仔鍾意煮野食,不訪考慮呢個好地中海風味的香草包,已經MIX好曬,用嚟煎魚烤雞/羊都幾惹味。香草成份包括: ORIGANO、BASIL、ROSEMARY、PARSLEY、MARJORAM等。放少少好啦,D味好勁 (眼訓時聞吓立即醒曬)~十蚊雞港幣有找…響CITY SUPER買就貴囉。

細細包但好耐用的香草

細細包但好耐用的香草

呢一系列的調味料雖然比唔上李錦記醬汁包方便,可以一開即用,但有英文INSTRUCTIONS都好易HANDLE。推介克羅地亞家常菜的代表STUFFED PAPRIKA(肉碎釀椒)同SARMA (椰菜卷)呢款。雖然都係釀椒,但又唔係好似我地煎釀三寶咁…佢係將D肉填滿成隻椒然後放湯煮的。至於椰菜卷係波斯尼亞傳統菜式,用酸椰菜包住D肉碎做成個手榴彈咁,然後同又係放湯煮。呢兩道菜冬天食都幾開心GA,夠暖胃!

右邊果款就係啦~

右邊果款就係啦~

AJVAR醬

克羅地亞人的BBQ恩物!原產地聽聞係馬其頓(MACEDONIA),材料包括: 蕃茄、茄子、紅椒(AGAIN!!)等,唔係好識形容佢個味道,但同牛同豬肉挺搭的。呢度D人鍾意烤完肉點AJVAR醬送麪包食。我唔係AJVAR粉絲,但如果你想試新口味,可以買嚟下次BBQ用!

有好幾個牌子有AJVAR,我建議PODRAVKA牌。同埋有分辣同唔辣,辣的克羅地亞文係”LJUT”,唔辣就”BLAGO”。不過辣都唔係真係好辣…

基本上,大家去任何一間超市就可以買到曬所有我以上介紹的產品 🙂 佢地都係我響格仔國成日食或接觸到的食物…好平民。其實平都可以唔失禮,越平民越貼近生活越能代表當地的文化。下次介紹稍為高檔的紀念食品—葡萄酒同松露。 響克羅地亞買手信好豐儉由人啊~