「不可能錯過你」系列之紀念(食)品三 —松露

少少宣傳:

今年香港的WINE AND DINE FESTIVAL會有克羅地亞酒同松露參展啊 ❤ 大家唔洗親身飛過嚟試啦! 今次會有HVAR島的ZLATAN OTOK酒莊的出品…佢地D酒有攞過國際獎項架。除左克羅地亞酒，好似仲有斯洛文尼亞同羅馬尼亞的…呢D應該都係超市甚至CITY SUPER都未必有;) 將D酒引入HK的MANDY小姐之前有嚟過SPLIT，我同佢有一面之緣啦。佢仲會響個BOOTH度介紹埋佢上次去過的TRUFFLE TASTING添。大家唔好錯過!

INFO:

WINEPRINTS CO. (BOOTH E309 Discovery Zone)
30 Oct 8-10pm
31 Oct 4-10pm
1 Nov 12-10pm
2 Nov 12-10pm

——————————————————————————

松露，菇界鑽石級人物，尤其是白松露。全世界出產松露的地方唔多，因為它們需要某種特定的氣候和濕度。響歐洲，最出名的松露之家應該係意大利，但其實格仔國同意大利接壤的ISTRIA半島都係盛產黑白松露的天堂:) 健力士世界紀錄最大粒白松露(唔知係咪賭王投返嚟果粒)就係響克羅地亞發掘出嚟架啦! 紀錄至今仍然保持!

如果真心鍾意食松露，就堅要去ISTRIA一趟!雖然你響克羅地亞其他城鎮的一些SOUVENIR SHOP或者大超市可以買到松露醬或者松露油，但點都比唔上響ISTRIA的松露專門店度可以試食，有專家同你介紹，仲可以買到D特別的產品好似松露芝士、松露PASTA、松露朱古力等等咁正。

我響剛過去的夏天去左ISTRIA一個叫MOTOVUN的小山城。由於個城位於松露森林附近，又多遊客，所以有超多賣松露的店。基本上一踏入個舊城區就可以聞到果浸松露獨有的味響空氣中瀰漫住。朋友們都買左D松露醬用嚟配多士呀，PASTA呀等等。而我就買左松露意粉同露筍意粉，因為比較平又特別…隔住個袋都聞到淡淡的香氣，但一煮完係無．味．道的…-__-“”(唔知係咪因為仲有一個月就到期的緣故)露筍果款稍為好D，都仲食到少少味…

戰利品! (左上) ZIGANTE黑松露切片…呢個品牌算大，有好多分店。健力士紀錄大白松露就係呢間公司的老闆掘到架! 除左切片，仲有各種松露醬同松露芝士醬…用家話陣味好濃，但食落就淡D (左下) NATURA牌白松露朱古力…氣味超方香，但我仲未捨得食，所以唔知味道如何…但「浸徐」已經夠掂啦!! (右)好出「色」但無味的松露意粉..要買懶特別意粉可考慮露筍味.

ISTRIA除左有松露，仲有好多靚景。可惜交通唔方便，建議自駕遊或者參加包接送的DAY TOUR (有一款係松露HUNTING，可以睇到隻狗仔點樣搵粒松露出嚟)。有好幾個克羅地亞的旅行社有做呢D ISTRIA DAY TOUR，但我上次同朋友係報呢個香港人安排的團，簡直係明智之選! 搵日再詳細介紹果次旅程;) 由5月到11月都係好時節，10月仲有各式各樣的松露FESTIVAL…響BUZET (TOWN OF TRUFFLE，好勁)會有好多松露食品，聽聞連雪糕都有(!?)…大家可以考慮一下:)

最後要介紹的是呢款響超市買的PASTA用嚟配松露醬等你返到HK都會食到ISTRIA的味道。響ISTRIA有款傳統手製PASTA叫FUŽI (音: FU-SHI)，個樣有D似長通粉。大部份餐廳都見到MENU有松露配FUŽI。大家見到” FUŽI”就買嚟試吓…如果搵唔到，我覺得呢隻PASTA都好味，味道同FUŽI都幾似，不過就厚身D 🙂

FUŽI

無FUZI就可以買呢個…好味的PASTA 🙂

大家如果想試吓格仔國松露配靚酒，可以去10月尾的WINE AND DINE搵BOOTH E204呀!

「不可能錯過你」系列之紀念(食)品二 — 葡萄酒

祖屋的首季度業績唔錯，由七月中到九月尾大部份日子都有客。我而家終於可以休息一陣…多D時間寫BLOG。上次預告左今篇講葡萄酒同松露…我呢D婦孺唔係咩專家，只係想介紹吓一D懶FANCY野俾一D同我一樣唔識飲/食但又有少少想有偽中產LIFESTYLE的朋友。有識之士，請不要太執著:P

葡萄酒

克羅地亞其實有出產好多優質的葡萄酒(有攞過國際獎項呢)，不過響香港好少有聽聞過同試過…因為佢地D酒少出口。原因係:

• D酒莊地方細，加上堅持人手摘提子，成本自然偏高…但又無好大的名氣去支持，唔似法國酒咁貴一貴都有人爭住買去…
• 又係因為D酒莊地方細，酒的產量唔係多到夠應付內需(滿街的餐廳同飲酒好似飲水的國民)之餘仲可以勁出口…

總而言之，大家響香港好難到飲到克羅地亞酒，所以一埸嚟到就一定要試吓!仲可以買番一兩支好野返去俾老闆或長輩…即刻好似好有品味咁 😉 以下介紹一D克羅地亞酒的葡萄品種(只有中歐，巴爾幹半島先有)、出名產區同幾支我親身試過或親耳聽聞係正野的酒。

極速入門簡介

紅酒葡萄品種: PLAVAC, PLAVAC MALI

白酒葡萄品種: MALVAZIJA, POŠIP, GRAŠEVINA, BOGDANUŠA

出名產區: HVAR, PELJEŠAC (DINGAČ, POSTUP), KORČULA, ILOK

*根據我響超市格價，最貴的酒通常係來自PELJEŠAC和HVAR的，可以去到200KN(~260HKD)一支…但一般嚟講40KN(~50HKD)左右已經可以買到好酒架啦~

如果其他大路品種好似CHARDONNAY, MERLOT等等都有啦…超多選擇!

MALVAZIJA白酒，只係響鄰近意大利的ISTRIA地區先有。我鍾意佢易入口，夠FRUITY…特別係呢個牌子:)

ILOCKI PODRUMI係個酒莊名，葡萄出產於克羅地亞東部的一個叫ILOK的小鎮。果個小鎮有悠久的釀酒歷史…我覺得果邊的白酒唔錯…最近佢地的GRAŠEVINA仲攞獎添~

來自KORCULA島的呢支酒好多餐廳都有得飲..信得過!POSIP呢隻提子係克羅地亞先有架!.響餐廳飲比響超市買返屋企飲貴一倍…你自己諗啦…

ZLATAN OTOK，好出名的一個酒莊，位於HVAR島(係呀，祖屋個島)。佢地呢隻POSIP白酒有攞過獎架!

呢隻PLAVAC MALI紅酒，來自PELJESAC半島，好出名的產區! PLAVAC 同埋PLAVAC MALI都係克羅地亞自家品種…大家要試喔!MADIRAZZA係間公司，佢地D 酒品質有保證…好多本地人會知呢個牌子。

DINGAC係PELJESAC半島的一個區…果度的酒特別好。認住個名呀同隻驢仔呀 🙂

講真，我買酒都係主要睇產區同葡萄品種(同價錢啦OF COURSE)…年份真係唔識。真係好鍾意品酒的朋友可以預先做D RESEARCH…呢個BLOG應該幫到手;)

https://winesofcroatia.wordpress.com/

我通常都係響超市買返屋企飲，但如果你想要有個特別D的體驗，可以考慮去酒莊參加WINE TASTING TOUR或者去一D WINE BAR度試。響SPLIT有間出名的WINE & CHEESE BAR叫PARADOX…非常唔錯，可以試吓有專家PAIR好的克羅地亞CHEESE同酒，有時仲有LIVE MUSIC PERFORMANCE添…好歐洲FEEL，又AFFORDABLE!

寫吓寫吓又咁長…松露仔又要擺落下篇…SORRY!

俊男美女

近期搞結婚野好忙，無時間打字(本人打中文係龜速)，所以好耐先update。之前提及格仔國盛產俊男美女，就如其他東歐國家一樣 😉 今次就post 吓相俾大家睇吓。客觀嚟講，d女整體質素係幾高，仔就ok啦…唔夠德國西班牙果d吸引(根據我睇運動員同球星的印象)。

東歐d女仔真係天生麗質，手腳超slim得嚟又有胸，眼睫毛又長又翹，搽少少mascara就好有神，好令人羨慕啊!以下呢幾個係我覺得幾靚的女明星 :-D其實有好多路人都好靚，不過好難明目張膽咁偷影 :-p…話時話，響克羅地亞要搵素顏出街的女仔好難，最起碼都會搽mascara同唇膏…可能競爭太大，唔能夠令自己太失色…

Tatjana Juric, 出名的model同節目主持人

 

 

 

 

 

 

 

 

Lana Jurcevic, 時而性感, 時而清純的女歌手

 

 

 

 

 

 

 

 

 

Ivana Roscic, 個人認為幾有性格的女演員

 

 

 

 

 

 

 

 

Zrinka Cvitesic, 最近攞左獎的舞台劇演員

 

 

 

 

 

 

 

 

 

 

 

本人鍾情深色頭髮的女仔，但根據我觀察呢度d女仔鍾意染金髮同埋將個嘴搽得勁紅…個trend好似係呢個好受歡迎的女朋星帶起。

Jelena Rozga, 勁紅的女歌手, 但我唔鍾意

 

 

 

 

 

 

 

好啦，輪到睇仔啦!老實講，唔會話wow~~~但鬼佬就係有身高、自信同好似好深情的眼睛呢d吸引人的地方。當然，要挑剔的話，就係頭髮稀薄…好多人禿頭(我果個都將會….傷心 T^T)同個啤酒肚都幾大!!以下呢幾個算係有d樣同知名度的男人。

Goran Visnjic, 當年有份拍ER, 而家都老老地的演員…呢張相好有拍洗頭水廣告feel

 

 

 

 

 

 

 

 

Maksim Mrvica, 鋼琴家, 好耐以前有去過香港宣傳

 

 

 

 

 

 

 

2CELLOS, 之前用大提琴玩流行曲, 響GLEE都有客串

 

 

 

 

 

Mladen Petric, 之前係響國家足球隊…個人認為佢cute得嚟又壞壞地<3

 

 

 

 

 

 

 

Milan Bandic, 克羅地亞首都Zagreb市長, 純粹個人認為老人家同政治家中算好charming的一位

 

 

 

 

 

 

 

 

 

 

大家嚟旅行都可以留意一下同你擦身而過的路人，可能比千年古蹟更吸引同難忘 😉

「不可能錯過你」系列之碧波暢泳

夏天嚟啦! 成個克羅地亞陽光普照，充滿生(+商)機，皆因夏天係格仔國最美麗、最吸引人的季節。歐美的遊客嚟呢度大部分係為左個海，同埋果個勁到不得了的陽光 B-) 講開又講，d鬼鬼真係好鍾意同陽光玩遊戲，曬得一身古銅色，蜜糖色的肌膚係男女老幼的目標。當年我同波蘭flat mate成日去海灘，佢支防曬係SPF 2 (!?)…而我果支係SPF 50…大家都俾對方果支嚇親…lol 後來我問佢2度的防曬有咩用，佢話當係moisturizer喎(!?)

背向鏡頭就係波蘭朋友 🙂 順便睇吓個海幾清~ 呢個係響Split市中心的海灘Bacvice

趁旅遊旺季開始，推介一下我個人認為夏天遊克羅地亞一定要做的指定動作 – 去游水!!克羅地亞成個西部都係臨海，同意大利東部相望，佢地中間就有亞德里亞海 (Adriatic Sea) 隔住。克羅地亞有好多好靚的海灘，海水清澈見底，又非常冰涼…由遠處望過去會見到淺綠淺藍到深藍的漸變，香港果d海灘就… -___-“ 仲要係d海灘通常距離市區唔遠…位置方便又唔洗錢水質又好，好難得! 如果市區d灘都好靚，可想而知偏遠地區果d無污染…簡直係天堂!我有幸去過一次「天堂」，係響一個叫Peljesac的半島上…落左船仲要開車十幾分鐘先去到…果個灘叫Divna ❤ 不過已經係六年前啦，唔知依家變成點…

藍藍綠綠的漸變…都係市區的海灘

Divna Beach, Peljesac

如果你會去克羅地亞游水，有幾樣野要注意喔~

1)      無更衣室

係有d煩…你要事先著左泳衣打底，去到個灘就當眾除衫除褲。為左方便起見，大家最好就著d又短又容易除的。有一d灘會有個好簡陋的位俾你換衫，但建議你都係最好著住泳衣去…穩陣d~ 女孩子唔洗覺得自己腳唔夠長，手臂又有bye bye肉而將自己包到實，唔好傻豬豬咁著牛仔褲同leggings…你響歐洲會係偏瘦的一群!俾d自信同俾個機會你d皮膚呼吸! (經常以此自我催眠…)

無更衣室就當然都無locker啦，所以行裝要盡量輕便。帶沙灘巾、水、防曬、內衣褲、少少錢就ok啦~ 貴重野帶唔帶就自己諗啦…雖然治安ok，我無聽過有人響海灘偷野，但如果無人幫你睇住始終有d唔安全。仲要提提大家，沙灘巾越大越好，游完水準備走都可以包住自己換一換條底底…濕笠笠會好唔舒服 😉

2)      無廁所

咁好有需要點算呢? 唔洗驚，總有一間café響海灘附近…不過最好幫襯一下先用人地的廁所啦~

3)      石春路

克羅地亞d海灘你遠睇同睇相會以為係沙灘…唔好俾佢fake倒，其實好多都係石灘嚟咖! 要行吓石春路先落到水…所以唔好以為可以好爽咁跑來跑去同埋響d沙度寫你同你個honey個名加大心心…你只可以好小心咁行。都好嘅…去游水送腳底按摩，一石二鳥 :-p 但如果你好唔鍾意你幼嫩的腳板底受到太大的刺激，可以事先research一下克羅地亞的沙灘或者可以響海灘附近或市集買對水鞋。我覺得有對水鞋幾好咖, 40kn左右一對…唔洗驚踩到海膽!

朋友誘人的腳…其實我想show的是石頭

4)      盡量避開11-3點出沒

呢段時間個太陽實在太毒…七八月我通常下晝4點幾先去，夏天8點幾9點先日落…夠曬時間hea! 不過，如果你想少d人同你爭個灘，都可以早d去…但記住塗大量防曬，如果唔想曬傷的話…

以上係根據我響克羅地亞南部海灘的經驗，唔敢講話所有灘都係咁…如果你發現某d灘d設備先進左，歡迎話我知…等我都update吓 🙂

格仔國簡介

好似無解釋到點解我叫克羅地亞做「格仔國」，而又無人問wor，唔通大家咁醒知道原因 (定還是無人care?)…查實係因為佢地支國旗有好多紅白格仔…等我Show吓支旗先!

croatia flag

實在係複雜都無人有…我記得當年小學(定中一呢?)要畫香港區旗，畫阿洋紫荊已經畫到我發炆憎….如果要畫克羅地亞呢支，應該會想放棄國籍…恨不得做個日本人! 之於支旗d公仔同格仔係代表咩…我問左屋企個local，佢只知道格仔上面果5舊野係代表左克羅地亞的5個主要區域。好學的你有興趣可以自己wiki一下…

格仔國國民只有4百50萬左右…每次我同佢地講香港有7百50萬人果時，大家都覺得好難以置信…其實我都覺得香港咁細的地方竟然塞得落咁多人都真係好難以置信!

頭先講過克羅地亞有5個主要區域…唔好睇佢係一個小國，東南西北都有非常唔同的風貌。東北有草原, 北部首都比較西歐feel, 西部有好多島嶼同漁港, 南部就有中世紀建築同古羅馬遺址。如果要深度遊，可以起碼玩兩星期。俾大家有個overview先~~

NEWS of Croatia

我依家住西南部，有靚靚的海又有可愛的石屋仔(係無工做…-__-“”)，但能夠呼吸清新的空氣，飲乾淨的水，同你愛的人一齊…that’s all we need in life, right?

好!講少少格仔國的特產先…依家只簡單介紹，日後會寫一篇特稿~

第一名: 水…無錯!食水.(北部的就一般啦)..好.好.飲!你擰開水龍頭就飲到，好冰涼清甜，仲有好多礦物質tim J

第二名: 酒…係呀，同好多地中海國家一樣，克羅地亞有出產自己的酒，有攞過獎架，但好少出口

第三名: 松露…全世界有出產黑白松露的地方極少!大家可能只知意大利…但其實克羅地亞都有架!!

第四名: 斑點狗…原產地係克羅地亞…又格仔又斑點，呢個國家真係好fashionable

第五名: 運動員…雖然唔係多到會響奧運獎牌排行榜頭幾名見到佢，但其實以一個小國呢講，歷史上都出過好幾十個獎牌運動員…都算對列祖列宗有交代。傳統強項有手球、waterpolo、跆拳道等等

仲有其他特產例如俊男美女(美女多過俊男)…搵日再詳談~~